5.4 趙 Tt 欲買一領皮䘥仔

5.4 Tiō Tt boeh bé chi̍t-niá phôe kah-á

Āu-lâi, che mā ùi sió-hō͘ ê siù-pâng thoân kàu tōa-hō͘ ê siù-pâng ah. In-ūi Chau Chhit-só chi̍t-ē tek-ì, kā yi ê tiû-toān kûn chhiáⁿ Tiō Tt [Thài-thài] kàm-sióng khòaⁿ-māi; iah Tiō Tt iū kā kóng hō͘ Tiō Thài-iâ thiaⁿ, koh kā o-ló chi̍t-ē. Tiō Thài-iâ tō tī chia̍h àm-tǹg ê sî hām Siù-châi tōa-iâ thó-lūn, jīn-ûi aQ si̍t-chāi sió-khóa koàix, lán ê mn̂g-thang tio̍h ài sió-sim. M̄-koh, i ê mi̍h-kiāⁿ m̄-chai iáu ū siáⁿ thang bé, hoān-sè mā ū kóa hó hòe-sek pah. Hit-sî, Tiō Tt tú siūⁿ boeh bé chi̍t-niá sio̍k koh hó ê phôe-kah-á. Chū án-ne, in ka-cho̍k koat-gī, iang Chau Chhit-só chek-khek khì chhōe aQ, jî-chhiáⁿ sin khui tē-saⁿ ê lē-gōa: chit-àm mā chiām-sî te̍k-chún tiám iû-teng.

Iû-teng tiám kah iû si̍h bē chió, aQ iáu bōe kàu. Tiō-hú kui-ke-hóe lóng chiâⁿ tio̍h-kip, chi̍t-bīn peh-ha̍h, ná hūn aQ oh-chhōe, ná oàn Chau Chhit-só kha-chhiú bān. Tiō Tt sīm-chì kiaⁿ i in-ūi chhun-thiⁿ hiah-ê tiâu-kiāⁿ m̄-káⁿ lâi, Tiō Thài-iâ kóng bián hoân-ló: in-ūi che sī "góa" khì kiò i lâi ê. Kó-jiân, tàu-té sī Tiō Thài-iâ ū kiàn-sek, aQ chóng-sǹg tòe Chau Chhit-só ji̍p-lâi ah.

"I kan-ta kóng bô, bô; góa kóng lí ka-tī tng-bīn khì kóng. I koh boeh kóng; góa kóng..." Chau Chhit-só chhoán phīⁿ-phêⁿ kiâⁿ kòe-lâi.

"Thài-iâ!" aQ boeh-chhiò-m̄-chhiò kiò chi̍t-siaⁿ, khiā tī gîm-chîⁿ-kha.

"aQ, thiaⁿ-kóng lí tī gōa-bīn hoat-châi loh," Tiō Thài-iâ sóa-pō͘ kòe-khì, ba̍k-chiu lia̍h i kui-sin-khu kim-kim khòaⁿ, ná kóng: "Chin hó, chin hó. M̄h, ... thiaⁿ-kóng lí ū kóa kū-hòe, ... ē-sái the̍h-lâi khòaⁿx leh, ... Che mā bô siáⁿ, in-ūi góa mā ū su-iàu..."

"Góa kā Chau Chhit-só kóng kòe ah, lóng bô ah-lah."

"Bô ah?" Tiō Thài-iâ put-kak chhut-siaⁿ kóng, "Ná ē siau kah hiah-nī kín?"

"He sī pêng-iú ê, pún-lâi tō bô chē. In koh bé kóa..."

"Chóng iáu ū chi̍t-kóa pah."

"Taⁿ kan-ta chhun chi̍t-tè mn̂g-lî."

"Tō the̍h mn̂g-lî lâi khòaⁿx leh."

"Nā án-ne, bîn-á-chài the̍h lâi tō hó," Tiō Thài-iâ bô kài jia̍t-sim ah. "aQ, í-āu ū siáⁿ mi̍h-kiāⁿ ê sî, lí chīn-liōng seng the̍h-lâi hō͘ goán khòaⁿ..."

"Kè-chîⁿ goán bē pí pa̍t-lâng chhut khah chió!" Siù-châi kóng. Siù-châi niû-kiáⁿ kín lió chi̍t-ē aQ ê bīn, khòaⁿ i ū kám-tōng bô.

"Góa ài chi̍t-niá phôe kah-á." Tiō Tt kóng.

--

5.4 趙 Tt 欲買一領皮䘥仔

後來, 這 mā ùi 小戶 ê 繡房傳到大戶 ê 繡房 ah. 因為鄒七嫂一下得意, kā 她 ê 綢緞裙請趙 Tt [太太] 鑑賞看覓; iah 趙 Tt 又 kā 講予趙太爺聽, koh kā o-ló 一下. 趙太爺 tō tī 食暗頓 ê 時和秀才大爺討論, 認為 aQ 實在小可怪怪, 咱 ê 門窗著愛小心. M̄-koh, 伊 ê 物件毋知猶有啥通買, 凡勢 mā 有寡好貨色 pah. 彼時, 趙 Tt 拄想欲買一領俗 koh 好 ê 皮䘥仔. 自 án-ne, in 家族決議, 央鄒七嫂即刻去揣 aQ, 而且新開第三个例外: 這暗 mā 暫時特准點油燈.

油燈點 kah 油蝕袂少, aQ 猶未到. 趙府規家伙 lóng 誠著急, 一面 peh-ha̍h, ná 恨 aQ 僫揣, ná 怨鄒七嫂跤手慢. 趙 Tt 甚至驚伊因為春天 hiah-ê 條件毋敢來, 趙太爺講免煩惱: 因為這是 "我" 去叫伊來 ê. 果然, 到底是趙太爺有見識, aQ 總算綴鄒七嫂入來 ah.

"伊干焦講無, 無; 我講你家己當面去講. 伊 koh 欲講; 我講..." 鄒七嫂喘 phīⁿ-phêⁿ 行過來.

"太爺!" aQ 欲笑毋笑叫一聲, 徛 tī 砛簷跤.

"aQ, 聽講你 tī 外面發財 loh," 趙太爺徙步過去, 目睭掠伊規身軀金金看, ná 講: "真好, 真好. M̄h, ... 聽講你有寡舊貨, ... 會使提來看看 leh, ... 這 mā 無啥, 因為我 mā 有需要..."

"我 kā 鄒七嫂講過 ah, lóng 無 ah-lah."

"無 ah?" 趙太爺不覺出聲講, "那會銷 kah hiah-nī 緊?"

"He 是朋友 ê, 本來 tō 無濟. In koh 買寡..."

"總猶有一寡 pah."

"今干焦賰一塊門簾."

"Tō 提門簾來看看 leh."

"若 án-ne, 明仔載提來 tō 好," 趙太爺無 kài 熱心 ah. "aQ, 以後有啥物件 ê 時, 你盡量先提來予阮看..."

"價錢阮袂比別人出較少!" 秀才講. 秀才娘囝緊瞭一下 aQ ê 面, 看伊有感動無.

"我愛一領皮䘥仔." 趙 Tt 講.

--

5.4

後來這終於從淺閨傳進深閨裡去了。因為鄒七嫂得意之餘，將伊的綢裙請趙太太去鑒賞，趙太太又告訴了趙太爺而且著實恭維了一番。趙太爺便在晚飯桌上，和秀才大爺討論，以為阿Ｑ實在有些古怪，我們門窗應該小心些；但他的東西，不知道可還有什麼可買，也許有點好東西罷。加以趙太太也正想買一件價廉物美的皮背心。於是家族決議，便托鄒七嫂即刻去尋阿Ｑ，而且為此新辟了第三種的例外：這晚上也姑且特准點油燈。

油燈干了不少了，阿Ｑ還不到。趙府的全眷都很焦急，打著呵欠，或恨阿Ｑ太飄忽，或怨鄒七嫂不上緊。趙太太還怕他因為春天的條件不敢來，而趙太爺以為不足慮：因為這是"我"去叫他的。果然，到底趙太爺有見識，阿Ｑ終於跟著鄒七嫂進來了。

"他只說沒有沒有，我說你自己當面說去，他還要說，我說…" 鄒七嫂氣喘吁吁的走著說。

"太爺！" 阿Ｑ似笑非笑的叫了一聲，在簷下站住了。

"阿Ｑ，聽說你在外面發財，"趙太爺踱開去，眼睛打量著他的全身，一面說。"那很好，那很好的。這個，… 聽說你有些舊東西，… 可以都拿來看一看，… 這也並不是別的，因為我倒要…"

"我對鄒七嫂說過了。都完了。"

"完了？" 趙太爺不覺失聲的說，"那裡會完得這樣快呢？"

"那是朋友的，本來不多。他們買了些，…"

"總該還有一點罷。"

"現在，只剩了一張門幕了。"

"就拿門幕來看看罷。"趙太太慌忙說。

"那麼，明天拿來就是，"趙太爺卻不甚熱心了。"阿Ｑ，你以後有什麼東西的時候，你儘先送來給我們看，…"

"價錢決不會比別家出得少！" 秀才說。秀才娘子忙一瞥阿Ｑ的臉，看他感動了沒有。

"我要一件皮背心。"趙太太說。

==