2.2 拍輸王胡

2.2 Phah su Ông-hô͘

aQ mā kā kiap-hiû thǹg lo̍h-lâi, ûn-á chhōe, m̄-chai sī in-ūi hiû-á tú sé kòe, a̍h-sī in-ūi i chho͘-sim, kòe chi̍t-tōa-khùn, i chiah lia̍h tio̍h 3-4 chiah. I khòaⁿ he Ông-hô͘, chi̍t-chiah koh chi̍t-chiah, nn̄g-chiah koh saⁿ chiah, khǹg tī chhùi ni̍h kā kah pix piakx.

aQ khí-thâu sī sit-bōng, āu-lâi soah put-boán: khòaⁿ-bē-khí ê Ông-hô͘ lia̍h hiah chē, ka-tī tian-tò lia̍h chiah chió, che sī gōa-nī m̄-chiâⁿ thé-thóng ah! I siūⁿ boeh chhōe chi̍t-nn̄g ê tōa chiah ê, soah chhōe bô, kúx chiah lia̍h tio̍h chi̍t-chiah tiong-hêng ê, chhehx kā that-ji̍p chhùi ni̍h, piàⁿ-miā kā lo̍h-khì, piak chi̍t-siaⁿ, iū bô Ông-hô͘ kā ê hiah hiáng.

I ê lia̍p-á-pa lóng âng khí-lâi ah, tō kā hiû-á siak tī thô͘-kha, phùi chi̍t-chhùi nōa, kóng:

"Chhì-mo͘-thâng ah!"

"Chhàu-thâu káu, lí mē siáng?" Ông-hô͘ gia̍h-ba̍k phúx kā khòaⁿ.

aQ chit-chām-á sui-jiân khah siū-tio̍h chun-kèng, ka-tī mā piàn khah hong-sîn-khì, m̄-koh nā hām hiah-ê koàn-sì kā phah ê êng-lâng, i iáu sī támx, to̍kx chit-pái i khiok chin-chiàⁿ chāi-táⁿ. Chit-lō móa-bīn hô͘-chhiu ê kioh-siàu iā káⁿ tōa-sè-siaⁿ sioh?

"Lí kóng siáng, tō mē siáng!" i khiā khí-lâi, siang-chhiú chhah-koh.

"Lí kut-thâu teh chiūⁿ sioh?" Ông-hô͘ mā khiā khí-lâi, kā saⁿ lom khí-lih.

aQ siūⁿ-kóng i boeh soan, tō hiòng-chêng, seng chhut-chhiú. Kûn-thâu-bó bōe-kàu soah seng hō͘ chang tio̍h, chi̍t-ē khiú, aQ tō phiân ǹg-chêng, koh khì hō͘ lia̍h tio̍h thâu-chang-bóe, boeh kā thoa-khì kho̍k-piah.

"Kun-chú chhut-chhùi bô chhut-chhiú!" aQ thâu-oaix kóng.

Ông-hô͘ chiah m̄-sī kun-chú leh, bô chhap i, tō liân-sòa kā kho̍k 5-ē, koh tōa-la̍t kā sak-khui, hō͘ poa̍h la̍k-chhioh gōa hn̄g, án-ne i chiah móa-ì lī-khui khì.

--

2.2 拍輸王胡

aQ mā kā 裌裘褪落來, 勻仔揣, 毋知是因為裘仔拄洗過, a̍h 是因為伊粗心, 過一大睏, 伊才掠著 3-4 隻. 伊看 he 王胡, 一隻 koh 一隻, 兩隻 koh 三隻, 囥 tī 喙 ni̍h 咬 kah pix piakx.

aQ 起頭是失望, 後來煞不滿: 看袂起 ê 王胡掠 hiah 濟, 家己顛倒掠 chiah 少, 這是 gōa-nī 毋成體統 ah! 伊想欲揣一兩个大隻 ê, 煞揣無, 久久才掠著一隻中型 ê, 慼慼 kā that 入喙 ni̍h, 拚命咬落去, piak 一聲, 又無王胡咬 ê hiah 響.

伊 ê 粒仔疤 lóng 紅起來 ah, tō kā 裘仔摔 tī 塗跤, 呸一喙瀾, 講:

"刺毛蟲 ah!"

"臭頭狗, 你駡 siáng?" 王胡攑目殕殕 kā 看.

aQ 這站仔雖然較受著尊敬, 家己 mā 變較風神氣, m̄-koh 若和 hiah-ê 慣勢 kā 拍 ê 閒人, 伊猶是 támx, 獨獨這擺伊卻真正在膽. Chit-lō 滿面鬍鬚 ê 腳數也敢大細聲 sioh?

"你講 siáng, tō 駡 siáng!" 伊徛起來, 雙手插胳.

"你骨頭 teh 癢 sioh?" 王胡 mā 徛起來, kā 衫 lom 起 lih.

aQ 想講伊欲旋, tō 向前, 先出手. 拳頭母未到煞先予㨑著, 一下搝, aQ tō 蹁 ǹg 前, koh 去予掠著頭鬃尾, 欲 kā 拖去硞壁.

"君子出喙無出手!" aQ 頭歪歪講.

王胡才毋是君子 leh, 無 chhap 伊, tō 連紲 kā 硞 5 下, koh 大力 kā 捒開, 予跋六尺外遠, án-ne 伊才滿意離開去.

--

2.2

阿Ｑ也脫下破裌襖來，翻檢了一回，不知道因為新洗呢還是因為粗心，許多工夫，只捉到三四個。他看那王胡，卻是一個又一個，兩個又三個，只放在嘴裡畢畢剝剝的響。

阿Ｑ最初是失望，後來卻不平了：看不上眼的王胡尚且那麼多，自己倒反這樣少，這是怎樣的大失體統的事呵！他很想尋一兩個大的，然而竟沒有，好容易才捉到一個中的，恨恨的塞在厚嘴唇裡，狠命一咬，劈的一聲，又不及王胡的響。

他癩瘡疤塊塊通紅了，將衣服摔在地上，吐一口唾沫，說：

"這毛蟲！"

"癩皮狗，你駡誰？" 王胡輕蔑的抬起眼來說。

阿Ｑ近來雖然比較的受人尊敬，自己也更高傲些，但和那些打慣的閒人們見面還膽怯，獨有這回卻非常武勇了。這樣滿臉鬍子的東西，也敢出言無狀麼？

"誰認便駡誰！" 他站起來，兩手叉在腰間說。

「你的骨頭痒了麼？」王胡也站起來，披上衣服說。

阿Ｑ以為他要逃了，搶進去就是一拳。這拳頭還未達到身上，已經被他抓住了，只一拉，阿Ｑ蹌蹌踉踉的跌進去，立刻又被王胡扭住了辮子，要拉到牆上照例去碰頭。

"君子動口不動手！" 阿Ｑ歪著頭說。

王胡似乎不是君子，並不理會，一連給他碰了五下，又用力的一推，至於阿Ｑ跌出六尺多遠，這才滿足的去了。

==